Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaata allanngortinneqarneranik Inatsisartut inatsisaat nr. 12, 11. november 2000-imeersoq.

 

§ 1.

Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaanni nr. 15, 31. oktober 1996-imeersumi makku allanngortinneqassapput:

 

1. § 2, imm. 1, ima oqaasertalerneqassaaq:
"    Aningaasaateqarfimmik takornariat unnuiffigisinnaasaannik pilersitsinermut aningaasalersuinikkut tapersiisartussamik Naalakkersuisut pilersitsissapput. Aningaasaateqarfiup aqqa malittarisassaalu Naalakkersuisut aalajangersassavaat, taamaattorli imm. 4 aamma § 3 takukkit. Aningaasaateqarfiup malittarisassai allanngortinneqarsinnaapput aningaasaateqarfik takornariat unnuiffigisinnaasaannik pilersitsinermut, alliliinernut nutarterinernullu aningaasalersuinikkut tapersiisinnaanngorlugu, kiisalu suliassaqarfimmi periarfissanik misissuisinnaanngortillugu nutaanillu suliuteqarsinnaalersillugu. Aningaasaateqarfiup malittarisassaani allannguutit Naalakkersuisunit akuerineqartassapput."

2. § 2, imm. 2, ima oqaasertalerneqassaaq:
"Imm. 2. Aningaasaateqarfik 15 mio. kr.-inik aningaasaatilerlugu pilersinneqarpoq, aningaasanngorlugit aningaasaliissutigineqarlutik akilerneqartunik. Aningaasaateqarfik suli amerlanerusunik aningaasaliiffigineqarsinnaavoq."

3. § 2, imm. 5, ima oqaasertalerneqassaaq:
"Imm. 5. Aningaasaateqarfiup aningaasaatini siunertat imm.1-imi taaneqartut saniatigut ingerlatsinermi aningaasartuutinut pisariaqartunut matusissutitut atorsinnaavai."

4. § 2, imm. 7-p kingorna, imm. nutaatut ikkunneqassaaq:
"Imm. 8. Aningaasalersuisarfimmi sulisoq, inatsit naapertorlugu allatsitut aningaasaateqarfiup suliassaanik isumaginnittoq, inatsimmi matumani pineqartunut qinnuteqaatit ilaasa aningaasalersuisarfimmit suliarineqarneranni peqataassanngilaq."

Imm. 8 matuma kingorna imm. 9-ngorpoq.

5. § 5, imm. 2, nr. 4-tut ikkunneqassaaq:
"4) Unnuisarfinnik pioreersunik nutarterineq."

6. § 6, imm. 1, ima oqaasertalerneqassaaq:
"    Aningaasalersuinikkut tapersiissutit assigiinngitsunik katiterlugit tunniunneqarsinnaapput, tarsigassarsiatut erniaqanngitsutut taarsersuutitaqanngitsutullu aamma taarsigassarsiatut ernialersukkatut imaluunniit taarsigassarsianut imaluunniit akiliutigeriaannagassatut atukkiussanut qularnaveeqqutitut. Aningaasaateqarfiup siulersuisuisa aalajangissavaat aningaasalersuinikkut tapersiissutit annertussusaat aamma taakkununnga tunngatillugu piumasaqatit allat, matumani taarsigassarsianut akilersuutinik ernianillu akiliuteqaqqusisarnissamut aamma akiliuteqartarnissamut tunngasut ilanngullugit, taamaattorli tak. § 7."

7. § 7 ima oqaasertalerneqassaaq:
"§ 7. Suliamut taaneqartumut aningaasaliissutinut tamarmiusunut annerpaamik 40%-ii inatsit manna naapertorlugu aningaasalersuutitut taarsigassarsiaritinneqarsinnaapput, tak. § 2, imm. 1. Taarsigassarsiarititat amerlassusiisa procentiisa annertussusiannut suliat ataasiakkaat akilersinnaassusiat kiisalu allanit aningaasalersorneqarsinnaassusiat apeqqutaassaaq. Taarsigassarsiarititat taaneqartut ikinnerpaamik 50%-ii taarsigassarsiatut ernialittut tunniunneqassapput. Taarsigassarsiat erniaqaratillu taarsersugassaanngitsut akuleriissitat, taarsigassarsiat erniallit kiisalu aningaasaateqarfiup qularnaveeqqusiineratigut taarsigassarsiat tammarnaveeqquserneqarneranni piumasaqaatigineqartutullu tulleriiaarneqarneranni imm. 2-4-mi piumasaqaatigineqartut malinneqassapput.
Imm. 2. Taarsigassarsiat ukiuni qulini akilersorneqassapput. Taarsigassarsiat erniaqaratillu taarsersuutitaqanngitsut aallaqqaammut amerlassusiisa 10%-ii taarsigassarsiat tunniunneqarnerinit qaammatit 12-ikkaarlugit nalikillilerneqartassapput.
Imm. 3. Taarsigassarsiarititat ernialersukkat erniaqartinneqarput ernialiunneqartartup diskontup qaqugukkulluunniit annertoqataanik, aningaasaateqarfiup tapiliussatut aalajangiussaanik qallerlugu, taamaattorli annerpaamik 2%-imik ilallugu.
Imm. 4. Aningaasaateqarfiup taarsigassarsisitsinera unnuisarfimmik aningaasaliiffigisamik qularnaveeqqusiinikkut isumannaarneqassaaq. Qularnaveeqqusiussaq sapinngisamik pitsaanerpaamik salliutinneqassaaq, taamaattorli aningaasaliissutit allat akueralugit aningaasiliissutit katillutik 40%-iinik amerlassusillit tikillugit, imm. 1-imi taaneqartut. Qularnaveeqqusiussaq taarsigassarsisitsisup sallinnguukkiartuaartussatut qalarnaveeqqusiiffigineratut issanngilaq.
Imm. 5. Taamaallaat qularnaveeqqusiiffigineqarsinnaapput aningaaserivinnit pisortanit nakkutigineqartunit taarsigassarsiat imaluunniit akiliutigeriaannagassatut atukkiussat. Taarsigassarsiat amerlanerpaamik 50%-ii qularnaveeqqusiiffigineqarsinnaapput.
Imm. 6. Qularnaveeqqutinik akiliisussatut Nunatta karsiata pisussaaffii tassaassapput missingersorlugit taarsigassarsiat sinneruttut amerlaqataat, aningaasat qularnaveeqquserneqartut aallaqqaammut taarsigassarsiarineqartut amerlassusaannut naleqqiussat."

8. § 8, imm. 1, ima oqaasertalerneqassaaq:
"    Unnuisitsisarfik taarsigassarsiat akilersorfissaata ingerlanerani siunertamut atorneqanngippat, taarsigassarsisitsinermi tunngavigineqartumut, imaluunniit taarsigassarsisitsinermi qularnaveeqqusiinermiluunniit piumasaqaatit malinneqanngippata, taarsigassarsiat nalikillilerneqanngitsortaat piaartumik akiligassanngussapput."

9. § 11, imm. 1-imi, oqaaseqatigiit aappaatut ikkunneqassaaq:
"    Tamatuma saniatigut allattoqarfik taarsigassarsiaareersut taarsigassarsiatut allatut aaqqissuunneqarnerannut piareersaaqataasinnaavoq, tak. § 14."

10. § 14 ima oqaasertalerneqassaq:
"§ 14. Aningaasalersuinikkut tapersiissutit tapiissutitut aamma taarsigassarsianut qularnaveeqqutitut tunniunneqarsinnaapput. Ataatsimiititaliap aningaasalersuinikkut tapersiissutit amerlassusaat atugassarititaasullu aalajangiiffigissavai.
Imm. 2. Aningaasalersuinikkut tapersiissutit, tunniussinermi tunngaviusut malillugit atorneqanngitsut, ataatsimiititaliamut utertillugit piaartumik akileqquneqarsinnaapput.
Imm. 3. Naalakkersuisut pisinnaatitaapput inatsit manna malillugu taarsigassarsiarititat pioreersut tapiissutinngorlugit, qularnaveeqqutinngorlugit taakkuluunniit akuleriillugit allanngortinnissaannik neqerooruteqarnissaminnut.
Imm. 4. Aningaasalersuinikkut tapersiissutit qanoq ittuunissaat qanorlu piumasaqaatitaqarnissaanut Naalakkersuisut malittarisassanik erseqqinnerusunik aalajangersaasinnaapput, aamma kapitali 3 naapertorlugu taarsigassarsiat pioreersut allanngortinneqarneri pillugit."

 

§ 2.

Inatsisartut inatsisaat ulloq 1. januar 2001 atuutilerpoq.

Namminersornerullutik Oqartussat, ulloq 11. november 2000

Jonathan Motzfeldt

/

Simon Olsen

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Aappassaaneerinninnermut allannguutissatut siunnersuut (akuerineqartoq)